ہبلی20؍اگست (ایس او نیوز)اینٹی کرپشن بیورو میں یڈی یورپا کے خلاف شکایت درج ہونے پر جو ایف آئی آر داخل کی گئی ہے اور یڈی یورپا کو سمن کیا گیا ہے اس پر برہم بی جے پی کارکنان نے ہبلی اور بنگلورو میں وزیراعلیٰ سدا رامیا کے خلاف احتجاجی مظاہرہ منعقد کیا۔
موصولہ رپورٹ کے مطابق ہبلی کے کورٹ سرکل کے پاس راستہ روکو احتجاج کیا گیااور وزیر اعلیٰ کے خلاف نعرے بازی کی گئی۔احتجاجیوں کا کہناتھا کہ سدارامیا کی طرف سے انتقامی سیاست کی جارہی ہے اور اینٹی کرپشن بیورو کووزیر اعلیٰ اپنے مفادات کے لئے استعمال کررہے ہیں۔جس کی وجہ سے یڈی یورپا پر تازہ کیس داخل کیا گیا ہے۔ احتجاجیوں نے دھمکی دی ہے اگر یڈی یورپا پر داخل کردہ کیس واپس نہیں لیے گئے توپھر آئندہ بڑے پیمانے پراحتجاج کرتے ہوئے جیل بھرو تحریک چلائی جائے گی۔
بنگلورو میں احتجاج: اسی طرح کا ایک بڑا احتجاج بنگلورو میں میسور بینک سرکل کے پاس بھی کیا گیا جس سے کچھ وقت کے لئے یہاں ٹریفک میں خلل پیدا ہوگیا۔سابق ڈپٹی چیف منسٹر آر اشوک نے اس معاملے میں وزیر اعلیٰ سدارامیا کو بدلے کی سیاست کرنے اورذاتی مفادات کے لئے اے سی بی کا ناجائز
استعمال کرنے کا ملزم ٹھہرا تے ہوئے ان سے استعفیٰ کی مانگ کی۔
خیال رہے کہ بنگلورو کے شری رام کارنت لے آؤٹ میں زمین کی ڈی نوٹیفائی کرنے کے معاملے میں ڈاکٹر ڈی ایپّا نامی شخص نے سابق وزیر اعلیٰ بی ایس یڈی یورپا کے خلاف اے سی بی کے پاس شکایت درج کی تھی جس کے بعد یڈی یورپا کے خلاف ایف آئی آر داخل کرتے ہوئے اے سی بی نے انہیں جانچ کے لئے طلب کیا ہے۔ اس کے جواب میں یڈی یورپا نے حاضری کے لئے دس دن کی مہلت طلب کی ہے اور خبر ہے کہ وہ اس ایف آئی آر کے خلاف عدالت سے راحت حاصل کرنے کی تگ و دو میں جٹ گئے ہیں۔
ڈاکٹر ایپّا کی وضاحت: دوسری طرف ڈاکٹر ایپّا کا کہنا ہے کہ ان کی شکایت کے پیچھے کوئی سیاسی مفاد شامل نہیں ہے۔سابق وزیر اعلیٰ یڈی یورپا شیورام کارنت لے آؤٹ میں قیمتی زمین کو ڈی نوٹیفائی کرنے کے ملزم ہیں جس سے سرکار کو 3,800کروڑ روپے کا نقصان ہوا ہے۔انہوں نے سوال کیا کہ اگر یڈی یورپا بے قصور ہیں تو پھر اے سی بی کے سامنے حاضر ہونے اور اپنی صفائی دینے سے وہ کیوں کترارہے ہیں۔اورانہیں ہائی کورٹ کے دروازے کھٹکھٹانے کی ضرورت کیوں پیش آئی ہے۔

کانگریس کی طرف سے صفائی : ادھر منگلورو میں پریس کانفرنس کرتے ہوئے لیجسلیٹیو کاونسل کے چیف وہپ ایوان ڈیسوزا نے کہا کہ یڈی یورپا کے خلاف کیس داخل کرنے اور تحقیقات کروانے میں کانگریس کا کوئی ہاتھ نہیں ہے۔ڈاکٹر ایپّا نے شکایت درج کی اور اے سی بی نے کیس داخل کرلیا۔ اس میں کانگریس کارول کہاں سے آگیا۔ مسٹر ڈیسوزا نے مزید کہا کہ کرپشن، جیل اور بیل(ضمانت حاصل کرنا) بی جے پی لیڈروں کاروزانہ کا معمول ہے۔خود بی ایس یڈی یورپا پر 24مقدمات دائر ہوئے ہیں۔ ایسے میں سدارامیا پر الزام لگانا بالکل غلط بات ہے۔کانگریسی حکومت نے عوام کی فلاح و بہبود کے بے شمار کام کیے ہیں جسے بی جے پی ہضم نہیں کرپارہی ہے ۔ اس لئے حکومت کو کمزور کرنے کے لئے بی جے پی کی طرف سے نئے نئے ہتھکنڈے استعمال کیے جارہے ہیں۔ لیکن ہم اس طرح کے دباؤ میں آنے والے نہیں ہیں۔